Robba Dan Krummi stigahæsti sheltie 2010

Fjár og hjarð var með jólafund 1. desember. Þar voru stigahæstu hundar deildarinnar (af hundasýningum HRFÍ) hverrar tegundar heiðraðir og fékk Krummi heiðurinn fyrir hönd sheltie að þessu sinni, enda komst hann í sæti í tegundarhóp á tveimur sýningum af fjórum.

Krummi fetar þar í fótspor ekki ómerkari hunda en Mola og Felixar :-) Felix náði reyndar þeim árangri að verða stigahæsti hundur af öllum tegundum deildarinnar fyrsta starfsárið hennar, en þá var ekki búið að kaupa bikar....

Gaman að þessu og falleg viðurkenning fyrir hellings vinnu, Krummi hefur verið glæsilegur fulltrúi okkar á sýningunum, glansandi fínn og vel sýndur.

Úttekt

Eftir sýninguna var skundað beint upp í Málningarskemmu á bak við Dekurdýr og þar beið aldeilis fallegur hópur. Þangað var stefnt shetland sheepdog eigendum með hunda sína í úttekt hjá Birgittu Svarstad. Af 37 skráðum hundum á landinu mættu 26 :-D

Birgitta fór yfir hvern hund, skoðaði á borði og mat hreyfingar á gólfi, en Þorbjörg hljóp með þá alla og stillti upp. Ég skrifaði eins og ég gat náð niður og reyndi svo að romsa upp úr mér samantekt fyrir viðstadda, eins hátt og ég gat, því lofthitakerfið keppti ansi hressilega við raddböndin.

Það tók tvo tíma að komast yfir hópinn, en þeim tíma var vel varið. Ómetanlegt að fá alla svona saman, geta litið yfir kynslóðir, séð saman systkini með foreldrum og heildina. Glöggt auga Birgittu missti ekki af neinu. Ég tók saman í grein sem birtist á sheltie.is helstu atriðin sem hún nefndi.

Aldeilis gott veganesti fyrir pælingar framtíðarinnar!